Y Wefan Gwasanaethau

Gwasanaethau Cyfredol - Uwchradd

Gwaedd Y Daleks!

gan Stuart Kerner

Addas ar gyfer Cyfnod Allweddol 3

Nod

Meddwl am natur drygioni.

Paratoad a deunyddiau

Gwasanaeth         

  1. Dechreuwch trwy ofyn pwy o’ch cynulleidfa sydd wedi bod yn gwylio’r rhaglen Doctor Who ar y teledu yn ddiweddar. Mae’n debyg y bydd nifer fawr yn ymateb yn gadarnhaol. Mae’r gyfres wedi denu 8 miliwn o wylwyr bob nos Sadwrn.
  2. Wrth gwrs, mae Doctor Who wedi bod o gwmpas ers dechrau’r 1960au, ac mae’n bur debyg bod rhieni rhai sydd yn y gynulleidfa wedi bod yn gwylio’r rhaglenni bryd hynny hefyd, flynyddoedd yn ôl.
  3. Yn wahanol i raglenni teledu eraill, mae’r prif gymeriad wedi cael ei chwarae gan ddeg o wahanol actorion,  Er hynny, mae’r rhaglen wedi parhau'r un mor boblogaidd.
  4. Mae’n debyg mai’r rheswm am hyn yw’r cysyniadau rhyfeddol sy’n rhan o’r rhaglen: y TARDIS, peiriant sy’n fwy o’r tu mewn nac ar y tu allan, sy’n teithio trwy amser a gofod; a’r TIMELORD, sy’n gallu adfywio’i hun yn gorff hollol newydd ddeuddeg o weithiau; a bydysawd cyfan o ALIENS od, rhai’n dda ac eraill yn hollol ddrwg.
  5. Y mwyaf anfad o holl elynion y Doctor, wrth gwrs, yw’r DALEKS, hil o fwtanau mewn arfwisg sy’n gweiddi ‘EXTERMINATE!’ cyn difa unrhyw un sy’n digwydd bod yn wahanol iddyn nhw.
  6. Creadigaeth ddiddorol yw’r Daleks. Nid bodau sydd fymryn yn ddrwg, neu’n ddrygionus ambell waith ydyn nhw.  Maen nhw’n gyfan gwbl ddrwg, heb nodwedd dda o unrhyw fath yn perthyn iddyn nhw.
  7. Nawr, ystyriwch a yw’n bosib i unrhyw un dynol fod mor hollol ddrwg â hyn, mor ofnadwy o ddrwg a heb unrhyw lygedyn o ddaioni yn perthyn iddo o gwbl?  Fe allen ni’n hawdd gredu bod llofrudd neu ormeswr yn ddrwg iawn, ond mae unbeniaid mwyaf y byd wedi dangos rhywfaint o emosiwn yng nghwmni rhai pobl.
  8. Efallai mai oherwydd bod y Daleks mor gwbl wahanol i ni – mor hollol annynol a chreulon - y gallwn ni eu hystyried fel pethau mor ddrwg. Efallai mai dyma ble mae’r ateb.  Dim ond pethau di emosiwn wedi’u rhaglennu ar gyfer drygioni all fod yn gyfan gwbl ddrwg.
  9. Mae’n bosib i fodau dynol fod yn ddrwg, ond mae’n bosib iddyn nhw hefyd newid, waeth pa mor ddrwg ydyn nhw.  Mae’n bosib i ni ddatblygu a newid ein ffyrdd.  Does neb y tu hwnt i obaith, ac mae pawb yn parhau i fod yn blant i Dduw.
  10. Os na wnawn ni roi cyfle i rywun, hyd yn oed pan fyddan nhw wedi ein siomi yn y gorffennol, fyddwn ni ddim gwell na’r Daleks – wedi’u rhaglennu i ystyried eraill fel bodau israddol.

 

Amser i feddwl

Myfyrdod:

Yn stori’r Creu yn y Beibl, mae’n dweud: ‘ . . . A gwelodd Duw fod hyn yn dda.’ Ond yn y rhan yn llyfr Deuteronomium 30.15, lle mae Moses yn cyfarch Israel, mae’r adnod yn dweud: ‘Edrych, yr wyf am roi’r dewis iti heddiw rhwng bywyd a marwolaeth, rhwng daioni a drygioni.’  O ble y daeth y drygioni?

‘Mae drygioni yn gallu bod yn dda. Y ffurf isaf o ddaioni ydyw. Os gwnewch chi weithredoedd da, daw hyd yn oed y drygioni yn dda; ond os byddwch chi’n pechu, fe fydd drygioni’n mynd yn ddrygioni llwyr.’  - addasiad o ddyfyniad gan Martin Buber (1878–1965)

Gweddi:

Annwyl Dduw,

Helpa ni i osgoi pob ffurf o ddrygioni,

ac i wrthod y demtasiwn i wneud rhywbeth sydd ddim yn iawn.

Gweddïwn dros yr holl bobl sy’n gwneud drygioni yn y byd.

Gweddïwn y byddan nhw’n newid eu ffordd o fyw

ac yn dysgu parch pobl eraill.

Amen.

Emyn

 


Gwasanaethau Uwchradd >>