Y Wefan Gwasanaethau
Gwasanaethau Cyfredol - Uwchradd
Cyfrinachau Llwyddiant
gan Joanne Sincock
Addas ar gyfer CA3
Nod
Ystyried sut rydyn ni’n llwyddo yn ein bywydau.
Paratoad a deunyddiau
- Efallai yr hoffech chi nodi pob un o’r pum cyfrinach ar dryloywder OHP neu restr PowerPoint.
Gwasanaeth
- Ydych chi wedi clywed sôn am ‘gyfrinachau llwyddiant’? Fe fydd pobl, yn rhy aml, yn ceisio gwerthu’r ‘cyfrinachau’ yma i chi a hynny am bris uchel iawn!
- Ewch i unrhyw siop lyfrau, ac fe gewch chi yno silffoedd ar silffoedd o lyfrau yn cynnig i chi'r allweddi i lwyddiant. Mae llawer o sioeau teledu yn honni eu bod yn gallu rhoi i chi'r holl awgrymiadau neu gyngor sydd ei angen arnoch chi i fod yn llwyddiannus, a hynny dros nos hefyd! Pe baech chi’n teipio ‘the secrets of success’ ar unrhyw beiriant chwilio’r rhyngrwyd, fe gaech chi dros 12 miliwn o ‘hits’.
- Heddiw, rydw i am rannu pump o gyfrinachau llwyddiant â chi, a fydda i ddim yn codi unrhyw dâl arnoch chi chwaith am y wybodaeth werthfawr yma!
- ‘Cyfrinach’ Rhif 1 - Pobl: Mae delio â phobl yn gallu bod yn beth anodd, ond mae pawb ohonom ni’n gwybod y dylen ni fod yn gwrtais a boneddigaidd. Rhaid i chi dderbyn y ffaith na allwch chi blesio pawb. Pan fyddwch chi’n dod ar draws un o’r bobl rheini na allwch chi eu plesio, waeth beth wnewch chi, y cyfan sydd raid i chi ei wneud yw bod yn gadarn ond yn barchus a chwrtais. Yn syml iawn, y gyfrinach yw trin pobl yn union fel yr hoffech chi gael eich trin eich hunan!
- ‘Cyfrinach’ Rhif 2 – Gwaith Caled: Waeth beth ddywed neb, dydi hi ddim yn hawdd dod yn gyfoethog ‘dros nos’, na phasio arholiadau heb adolygu – dydi pethau felly ddim yn digwydd, byth. I fod yn llwyddiannus mae angen gweithio, a hynny’n galed. Dywedodd Thomas Edison, y dyfeisiwr mwyaf llwyddiannus erioed, ‘does dim all gymryd lle gwaith caled’.
- ‘Cyfrinach’ Rhif 3 – Ymrwymiad: Gan ehangu ar ‘gyfrinach’ gwaith caled, rhaid i chi ymrwymo i lwyddo. Rhaid i chi fod yn fodlon aberthu a gweithio am oriau hir. Fydd hyn ddim yn digwydd ‘dros nos’ chwaith ... fe allai gymryd blynyddoedd. Ydych chi’n barod am flynyddoedd o waith caled, rhwystredigaethau, pethau’n mynd yn dda bob yn ail a heb fod cystal, delio â phobl (hawdd ac anodd), cael eich gwrthod, a phopeth arall sy’n rhan o becyn ‘llwyddiant’?
- ‘Cyfrinach’ Rhif 4 – Balchder: Byddwch yn falch o’ch gwaith. Fe fydd eich gwaith yn adlewyrchiad ohonoch chi. Codwch eich enw da, er mwyn i hynny fod yn sylfaen dda i lwyddiant. Byddwch yn ffyddlon i chi’ch hun ac i’ch gwaith.
- ‘Cyfrinach’ Rhif 5 - Gosod nod: Byddwch yn ymwybodol o’r hyn rydych chi eisiau, a sut rydych chi eisiau ei gael. Peidiwch â mynd ar eich pen i rywbeth yn ddall heb gynllunio rhywfaint ar eich amcanion a’ch cyflawniad. Defnyddiwch amcanion tymor byr, llai er mwyn cyrraedd yn y pen draw amcanion tymor hir eithaf eich llwyddiant. Fe fydd hyn yn cadw trefn ar unrhyw ofnau ynghylch methu.
- Wrth gwrs, dydi’r ‘cyfrinachau’ yma yn ddim mwy, mewn gwirionedd, na synnwyr cyffredin a gwaith caled. Rydyn ni i gyd yn gwybod am y ‘cyfrinachau’. Ond mae’n rhaid i ni eu cymhwyso nhw, a’u defnyddio’n gyson.
Amser i feddwl
Myfyrdod:
Rydych chi wedi ‘methu’ droeon. Efallai dydych chi ddim yn cofio, ond fe wnaethoch chi syrthio y tro cyntaf i chi ddechrau cerdded. Fe aethoch chi o dan y dwr cyn i chi ddysgu nofio. Fuoch chi bron â boddi? Wnaethoch chi daro’r bel y tro cyntaf y gwnaethoch chi swingio’r bat? Saith gwaith y methodd R.H. Macy, cyn i’w siop fawr yn Efrog Newydd ddechrau llwyddo. Cafodd y nofelydd John Creasey 753 o lythyrau yn ei wrthod cyn iddo wedyn gyhoeddi 564 o lyfrau. Peidiwch â gofidio os dydych chi ddim yn llwyddo ar y dechrau. Gwell i chi ofidio am y cyfle rydych chi’n ei golli wrth i chi beidio rhoi cynnig arni. Does dim rhaid i chi fod yn arwain o’r tu blaen os ydych chi’n ddigon dewr i ddod yno o’r cefn.
Er mwyn cael bod yn seren, rhaid i chi ddysgu adlewyrchu eich golau eich hun, dilyn eich llwybr eich hun, a pheidio â phoeni am y tywyllwch, gan mai yn y tywyllwch y mae sêr yn disgleirio ar eu gorau.
Gweddi:
Bydded i’r ffordd godi i gwrdd â chi;
Bydded i’r gwynt fod y tu cefn i chi;
Bydded i’r haul ddisgleirio’n gynnes ar eich wyneb;
Bydded i’r glaw ddisgyn yn ysgafn ar eich meysydd.
A nes y byddwn yn cwrdd unwaith eto, bydded i Dduw eich dal ar gledr ei law.
Amen.
